ھندوستان ءِ جاھگیر کلبھوشن یادو ءِ مات ءُ لوگبانک ءِ ماں پاکستان ءَ دزگیری ءَ پَد، ھندوستان ءُ دگہ دری ملکاں زانگ لوٹیت کہ ھما بلوچ زھگ ءُ زالبولانی سرا چے گوزگ اِنت کہ آ پاکستان ءِ چیریں دست ءُ لشکر ءِ دست ءَ گار ءُ بیگواہ کنگ بوتگ اَنت۔ ھیر بیار مری
بلوچ رھشون واجہ ھیر بیار مری ءَ کلبھوشن یادو ءِ کماشیں مات ءُ آئی ءِ زالبول ءِ ماں پاکستان ءَ دزگیری ءِ بابت ءَ ماں چاگردی رسانکدر فیس بک ءَ وتی درشانے ءِ تھا گوشتگ، اے وئیل ھندوستان ءُ دگہ دری جھان ءِ چمّانی پچ کنگ ءَ بَسّ اِنت کہ پاکستان ءِ دست ءَ گار ءُ بیگواہ کرتگیں بلوچ زھگ ءُ زالبول ماں پاکستانی چیریں زندانانی تھا کجام مشکل ءُ غیر انسانی تکلیفاں گوں دچار اَنت۔
اے زانگ ءِ ھاترا دگہ زانت ءُ زانشے پکار نہ اِنت کہ وھدیکہ پاکستان پیر سالیں زالبولانی بے شرپی ءَ کنت کہ آ وتی زھگ ءِ دچار کپگ ءَ ماں پاکستان ءَ کا اَنت۔ تہ بلوچ زندانی کہ آھانی تھا زھگ ءُ زالبول ھوار اَنت ماں پاکستانی زندانانی تھا چونیں چونیں تکلیف سَگّگ ءَ اَنت۔
ھیر بیار مری ءَ پاکستانی سنیٹر فرھت اللہ بابر ءِ گپ دیما آؤرتگ انت ءُ گوشتگ، آئی ءَ اے گپ منّ اِتگ کہ ’’پاکستان ءِ بازیں دمگاں ٹارچر سیل پچ کنگ بوتگ اَنت۔ ایوک اے نہ انت کہ پاکستان ءِ پارلیمنٹ ءُ سپریم کورٹ سرپد اَنت کہ چنکہ ٹارچر سیل پاکستان ءَ پچ کنگ بوتگ بلکہ اے ردا بازیں مردم سرپد اَنت کہ بازیں کَس ماں ٹارچر سیلانی تھا مرگ ءِ اماچ کنگ بوتگ اَنت۔ کس پوہ نہ انت کہ اے مردم چون کُشگ بوتگ انت‘‘
بلوچ رھشون واجہ ھیر بیار مری ءِ ردا ھندوستان ءِ شہر وند کلبھوشن یادو ماں بلوچستان ءَ دزگیر کنگ نہ بوتگ۔ آ ایران ءِ دگہ دمگان پاکستان ءِ مذھبی کارمنداں دزگیر کرتگ ءُ آئی ایس آئی ءِ دست ءَ داتگ۔ اے ردا بازیں راستی ھست انت کہ پاکستان ءِ داشتگیں مذھبی کارمنداں ماں اوگانستان ءُ دگہ دمگاں بازیں بلوچ پناہ گیر دزگیر کرتگ انت ءُ پاکستان ءِ دست ءَ داتگ اَنت۔
پاکستان ءِ کار مندیں تالباناں 70 ءُ 80 ءِ دھک ءَ بازین بزّگیں مری بلوچ دزگیر کرتگ ءُ پاکستانی آئی ایس اائی ءِ گور ءَ بھا کرتگ اَنت۔ لھتے بلوچ شھید کرتگ ءُ آھانی عکس کشّ اِتگ ءُ چہ پاکستان ءَ زَرّ گِپتگ۔
پاکستان یک ھَنچیں ملکے کہ آئی ءِ سرا ھچ بھیسہ کنگ نہ بیت۔ پاکستان ھما مار اِنت کہ وتی پودینوک ءَ ھوں ڈَنگ جَنت۔
ھیر بیار مری ءَ گوشتگ پاکستان ءَ ھچ وڑیں سوگند ءُ مسام نہ داریت۔ نواب نوروز خان قرآن ءِ نام ءَ ریپّینگ ءُ دزگیر کنگ بوتگ۔ پدا آئی ءِ زھگ ماں ھیدرآباد ءَ پاھو دیگ بوتگ اَنت ءُ آ جیل کنگ بوتگ تاں ھما وھد ءَ کہ آ بیران بوتگ۔ ھمے وڑا پرنس کریم قران ءِ نام ءَ لوٹائینگ بیتگ بلوچستان ءِ دمگ ھربوئی ءَ آئی ءِ سرا ارش کنگ بیتگ ءُ ارش ءَ چہ آئی ءِ بازیں سنگت شھید بوتگ انت ءُ آ دزگیر کنگ بوتگ۔
