چائنا ءُ پاکستان بلوچ راج ءَ گار ءُ بیگواہ کنگ لوٹ اَنت: ھیربیارمری

بلوچی رھشون ءُ فری بلوچستان موومنٹ ءِ سروک ھیربیار مری ءِ اے ھالتران ھندوستان ءِ ھالتاک "ٹی ایس جی سنڈے گارڈین لائیو" ءَ شنگ بوتگ۔ پہ بلوچی ءِ وانوکاں ما اے ھالتران ءَ ادا شنگ کنگ ءَ اِنت

جُست: بلوچ راجی جُنز ءِ درگت ءَ ھَستیں جاوراں چون چارَگ بہ بنت؟  میدان ءَ اے چِنکہ مُھکم اِنت، ھمے پُژدر ءَ کہ بازیں سرخیلیں رھشون درانڈیھ ءَ اَنت؟ 

پَسّہ: بلوچ راجی جُھد بئید ء ھمساھگیں مُلکانی کمک ءَ گوں کمّیں وسیلت ءَ برجم ءُ جاری اِنت۔ 1948 ءَ بلوچ ڈگار ءَ پاکستان ءِ ایر دستی ءَ بگر تاں ھَنّوں بلوچ وتی راجی آزادی ءِ دو بَر پچگرگ ءَ جُھد کنگ ءَ اِنت۔ وھدیکہ ماں درانڈیھ ءَ بلوچ رھشون ءِ گپ اِنت تہ ما کل بلوچ اِنت ءُ بلوچستان مئے ڈگار اِنت ءُ گوں پاکستان ءَ مئے ھچ وڑیں سیادی نیست۔ ماں پاکستان ءَ آجوئی دوستیں گَلانی ھاترا جمہوری سیاست پد نبودیں ھیالے۔ آ (پاکستان) سرخیلیں بلوچ رھشون چوکہ نواب اکبر بگٹی ، غلام محمد بلوچ،  ڈاکٹر منان،  جلیل ریکی ءُ دگہ مردمانی آوار جنگ ءُ کوش ءَ ھوار اِنت کہ آ پُر ایمنیں سیاسی جُھد ءِ بھر بوتگ اَنت۔ ھمے وڑا پاکستان ءِ سرجمیں جُھد ھمیش اِنت کہ آ بلوچ ءِ آجوئیں لوٹوکیں رھشون ءَ یک یک ءَ ھلاس بہ کنت ءُ آجوئی ءِ جھد ءَ نزور ءُ ناتوان بہ کنت۔ بلے اے مئے ذمہ واری اِنت کہ بلوچ راجی جھد ءَ برجم بہ داریں۔ تُری اے درگت ءَ ما درملک ءُ درانڈیھ ءِ نندگ ءَ پہ لاچار بہ بئیں۔ مئے جھد ءِ سوب مندی پہ بلوچ ءُ اے دمگ ءَ ارزشت دار اِنت بہ نسبت ء اے گپ ءَ کہ ما کجا اِنت ءُ چون وتی جھد برجاہ داشتگ۔

جُست: بازیں رپورٹانی ردا گوستگیں لھتے سال ءَ بازیں بے سِلاھیں بلوچ پاکستان ءِ لشکر ءَ آوار جتگ ءُ بیگواہ کُرتگ اَنت۔ تئی ردا دَمگ (بلوچستان) ءَ چنکہ مردم آوار جنگ بوتگ ءُ چے چُشیں راہ ءُ دری ھست کہ شُما میان استمانی گلانی دیم ءَ وتی لوٹاں منّارینت بہ کن ئے، (آھانی بھیسہ ءَ زُرت بہ کن ئے) ؟

 پسّہ: مئے سرپدی ءِ ردا بلوچ راجی جنز ءِ ھستیں زرمبشت ءِ بندات ءَ بگر تاں ھنّوں بلوچستان ءِ بازیں دمگاں 20000 بلوچ پاکستان ءِ لشکر ءَ آوار جتگ اَنت کہ آھانی تھا زھگ ءُ زالبول ھوں ھوار اَنت۔ اے زوریں بیگواھیانی درچ ھمودا بندات بوت کہ مشرف ءَ گوں ملٹری ءِ پاور ءَ اُگدہ وتی دست ءَ زُرت۔ ءُ اے درچ تاں انگت برجاہ اِنت۔ اے ردا باز کم مردم پہ ھمے شرت ءَ وئیل کنگ بوتگ کہ آ بلوچ راجی آجوئی ءں جنز ءَ کمک نہ کن اَنت ءُ نہ کہ ھوار بنت۔ 

بلوچستان پراہ ءُ شاھگانیں دمگے ءُ اودا آبادی ءِ کساس کم اِنت۔ پاکستان ءِ لشکر ءَ بازیں میتگ ءُ بازار چہ زمین ءَ ولگوج کُرتگ اَنت ءُ اودا کُلّیں مردم بیگواہ کُرتگ اَنت۔ رسانک ءِ نہ بوئگ ءِ سوب ءَ مردم مزنیں آبادیاں وتی گپ ءَ سر کُرت نہ کن اَنت۔ دومی مستریں جیڑہ ھمیش اِنت کہ بنی آدمی حقانی گل ءُ کارندہ گار ءُ بیگواھیں مردمانی لَڑ ءَ یکجاہ کُرت نہ کن اَنت۔ ءُ گار ءُ بیگواھیں مردمانی کھول ھوں دیم ءَ اَتک ءَ کیساں فائل کُرت نہ کن اَنت کہ  چوش مہ بیت پاکستان ءِ چیریں دست آھانی بیگواھیں زھگ ءُ مردماں تاوان بہ دینت۔ بازیں راہ ءُ در ھست اَنت کہ بنی آدمی حقانی گل بیگواھیں مردمانی لَڑ ءَ راست کُرت کن اَنت۔ آھاں بنکی راستی ءِ پولگ ءِ ھاترا بلوچستان ءَ "فیکٹ فائنڈنگ مشن" دیم دیگ لوٹ اِیت ءُ بیگواھیں بلوچانی کھولاں گوں گپ جنگ لوٹ اِیت۔ بیگواھیں بلوچانی کھول شال ءَ پریس کلب ءِ دیم ءَ نشتگ اَنت۔ میان استمانی گل راستی ءِ پولگ ءِ ھاترا اودا چہ بندات کُرت کن اَنت ءُ پدا بلوچستان ءِ دگہ دگہ ھند ءُ دمگاں۔ 

بلے تاں ھما وھد ءَ پاکستان ءِ لشکر بلوچستان ءَ ھست اِنت۔ میان استمانی کمیونٹی بنی آدمی حقانی لگتمالی ءِ راستیں کساس ءَ مالوم کُرت نہ کن اَنت۔ پاکستان ءِ لشکر میان استمانی گلاں ھچبر اے موہ ءَ نہ دنت آ اِشی ءِ زوراکیانی راستیں دروشم ءَ بہ گِند اَنت۔ وھدیکہ یو این او ءِ ورکنگ گروپ آن انفورسڈ اینڈ انوولنٹری ڈیساپیئرنس (Working Group on Enforced and involuntary Disappearances) ءَ 2012 ءَ بلوچستان ءِ تر ءُ تاب کُرتگ اَت۔ آ ایّوک شال ءَ سرینہ ھوٹل ءَ دارگ بوتگ اَنت۔ ءُ بلوچستان ءِ دگہ دمگانی تر ءُ تاب ءَ مکن کنگ بوتگ اَنت۔ ما ھچبر شموشگی نہ اِنت کہ پاکستان ءِ لشکر ھما لشکر اِنت کہ اشی ءَ دومی جھانی جنگ ءَ پد، انسانیت ءِ ھلاپ ءَ مستریں زُلم ءُ زوراکی کُرتگ کہ لَکّانی کساس ءَ بنگالیانی کُشت ءُ کوش ءُ کُرتگ ءُ گوں آھاں بدکاری کُرتگ۔

پسّہ: پاکستان ءِ ردا بلوچ راجی جُنز ءَ ھندوستان ءِ دزمانجنی ھوار اِنت۔ پاکستان ءِ اے گپ ءِ تھا چنکہ راستی ھَست اِنت؟ 

پسّہ: بلوچ راجی جُنز یک دراجیں راجدپتر ءُ بُنکے داریت۔ بلوچاں مغل،  پرتگیزی ءُ دگہ اُرش کارانی چو کہ پرنگی سلطنت ءِ ھلاپ ءَ ھما وھد ءَ جنگ کُرتگ کہ ھندوستان ھوں گُلامی ءِ زمزیلانی پروشگ ءَ گُلائیش بوتگ۔ 1840 ءَ مری بلوچ جنگولاں جنگ ء سارتاپ ءُ جنگ ء نپوسک ءَ برٹش ڈیچمنٹ ءَ تباہ کُرتگ۔ اوّلی جھانی جنگ ءِ وھد ءَ وھدے کہ پرنگی ءَ بلوچ ٹکّانی (ماں وتی آرمی ءَ) برتی بوئگ ءِ لوٹ کُرتہ کہ مری بلوچاں آھانی ٹوپاں تیل ءِ دیگ ءَ انکار کُرتگ ءُ پرنگی لشکر ءِ ھلاپ ءَ دو ٹوھیں جنگ کُرتگ۔۔۔۔۔ 1917 ءَ جنگ ء گمباز،  1918 ءَ جنگ ء ھارب۔۔۔۔۔ دوئیں جنگاں بئید ء، مزنیں تاوان ءِ چِست کنگ ءَ بلوچ جنگول پُشت ءَ نہ کِنز اتگ اَنت۔ ھمے وڑا ماں بلوچستان ءَ پرنگی لشکر ءِ ھلاپ ءَ سیاسی جھد ھوں برجاہ بوتگ۔ (نوں کہ کسے بہ گشیت) ادا ھچ چُشیں گپّے پشت نہ کپ اِیت: اے کُلّیں جنگ ءُ بجنگانی پُشت ءَ ھندوستان ءِ دست ھوار بوتگ/ آئی ءَ بلوچ باپرینتگ اَنت۔ پرچاکہ آ وھد ءَ ھندوستان وت وتی آجوئی ءِ ھاترا جُھد ءَ بوتگ۔

پاکستان ءِ چُشیں بھتام ءَ ھچ ارزشت نیست۔ پرچا کہ پاکستان ءَ ماں بلوچستان ءَ وتی جنگی زوراکیانی چیر دیگ ءِ ھاترا مدام دومیانی سرا ھمے بھتام جتگ ءُ جنگ اِنت۔ پاکستان ءَ تنیگہ 20000 بلوچ آوار جتگ ءُ بیگواہ کُرتگ اَنت ءُ 6000 ءَ چہ گیش کُشتگ ءُ آھانی جون ماں ویرنداناں چگل داتگ اَنت۔ بلے روچ ء مروچی درملکی چُشیں کیس ئے دیم ءَ نیاتکگ تانکہ پاکستان ءِ وتی آمیدگس ءَ ھوں(کہ پاکستان ءِ بھتام ءَ راست بہ کنت) اے مستریں منّانک اِنت کہ بلوچ جھد ابئید ء درملکی کمک ءَ وتی تھی ءُ تو کی مدت ءُ کمک ءَ دیم ءَ جُنزگ اِنت۔

جُست: پاکستان CPEC ءِ درگت ءَ ھمے درور ءَ دیم ءَ کاریت کہ بلوچستان ڈالچار کنگ نہ بوتگ۔ CPEC پہ بلوچستان ءِ مردماں چے سیتّ ءُ چے تاوان اِنت؟ 

پسّہ: CPEC پہ بلوچانی بیگواھی ءَ یک colonize توجیلے سازگ بوتگ کہ اِشی ءِ مول ءُ مراد چائنا ءِ فوجی تاگت ءَ  (ماں اے دمگاں) مھکم کنگ ءُ برجاہ دارگی اِنت۔ بلوچستان ءِ اوّلی ایردست کنوک پاکستان اِنت ءُ پدا گیشیں مال ءُ مڈّی ءِ ھاترا پاکستان ءَ بلوچستان چائنا ءَ باڑہ داتگ۔ پیش ءَ ھوں بازیں رپورٹ دیم ءَ اتکگ اَنت کہ تاں 2048 ءَ ماں گوادر ءَ چائینیزانی کساس چہ بلوچانی کساس ءَ گیش ودّیت۔ وھدے کہ 2023 ءَ تاں اے "ایّوک چینی میتگ" (chinese-only city) جوڑ کنگ لوٹ اَنت۔ چہ اِشی ءَ 5 لکھ چائنیز ماں گوادر ءَ نِندارینگ بنت۔ سی پیک دیمروی ءِ اسکیمے نہ اِنت۔ اے بلوچانی مرگ ءُ بیگواھی ءِ "کوریڈور" اِنت. اگاں یک برے  چائنا ماں بلوچستان ءَ بنجل کنگ ءَ سوب مند بہ بیت تہ ماں جیونی ءُ سونمیانی ءَ لشکری بُنجل ءِ جوڑ کنگ ءَ سوب مند بیت۔ پدا اے ایّوک پہ بلوچ ءَ ناں،  پہ ھندوستان،  امریکہ ءُ یورپ ءَ ملٹری پاتراپے ءِ نشون بیت۔ بلوچ ڈگار اے دمگانی تھا یک ارزشت داریں دمگے،  اگاں چائنا ماں اے دمگ ءَ بنجل کنگ ءَ سوب مند بہ بیت تہ وتی فوجی تاگت ءِ وسیلت ءَ زرباری ایشیا،  مڈل ایسٹ ءُ دگہ بازیں دمگاں سر بوئگ ءِ توجیل ءَ داشت کنت۔

جُست: گوستگیں سال ءَ ماں کراچی ءَ چینی قونصل خانہ ءِ سرا ارش بوتگ اَت۔ اے ارش ءَ بھتام (پاکستان ءِ) پولیس ءَ تئی سرا ھوں مُشتگ۔ بئید ء چہ اِشی ءَ ماں بلوچستان ءَ دگہ بازیں ارشاں چائنیز نشانگ کنگ بوتگ اَنت۔ زان ئے چے بلوچ چین ءَ وتی دژمن سرپد بنت۔ چو پرچا؟  

پسّہ: ھچ شک نیست،  گوں بلوچ ءَ چائنا ءُ پاکستان ءِ دژمنی ءِ کارپد  یک ھساب ءَ اَنت۔ چین ءُ پاکستان وتی ایردستی ءُ مالی نپ ءُ سیتانی ھاترا پنجابی ءِ آباد کاری ءَ ماں بلوچستان ءَ مھکم کنگ لوٹ اَنت۔ چو کہ بُرز ءَ ڈس دیگ بوتگ اَت کہ پہ نام "چائنا پاکستان اکنامک کوریڈور" یک دیمروی ءِ اسکیمے نہ اِنت بلکیں یک فوجی اسکیمے کہ اِشی ءِ وسیلت ءَ چین بلوچ زِر ءَ نندگ ءُ میان ایشیائی باپاری راھاں وتی دست ءَ آرگ لوٹ اِیت۔

وھدے کہ کراچی ارش ءَ منی نام ءِ دیم ءَ آرگ اِنت،  اے ایّوک یک بھتامے، کہ پاکستان ہر وھد ءَ اِشی ءَ دیم ءَ کار اِیت۔ من چُشیں بھتام ءَ رد کن آں۔ بلے یک گپّے من تچک کنگ لوٹاں کہ میان استمانی کانودانی ردا بلوچ اے حق ءَ دار اِیت آ درملکی قبضہ گیر ءُ آباد کارانی ھلاپ ءَ وتی ڈگار ءِ پانک ءَ بہ جَنت۔ چین ءُ پاکستان بدماشیں ملک اَنت۔ اے کرائمنل ءُ قبضہ گیر اَنت کہ مئے راج ءَ گار ءُ بیگواہ کنگ لوٹ اَنت۔ پاکستان ہر وھد ءَ جنگی کانود ءُ رھبند ءُ میان استمانی کنوینشن ءِ لگتمالی ءَ کنگ اِنت ءُ بے سلاھیں مردم،  زھگ ءُ زالبولاں نشانگ کنگ اِنت۔

جُست: مزن وزیر نریندرا مودی ءَ 2016 ءَ اولی رند ءَ بلوچستان ءِ جیڑہ دیم ءَ آؤرتگ اَت۔ شُمئے نزّا ھندوستان ءِ سرکار ءَ بلوچ راجی آجوئی ءِ جنز ءِ پلہ مرزی ءَ گیشیں گامگیجے زورگ لوٹ اتگ اَت؟  

پسّہ: ھو،  2016 ءَ مودی ءَ راجی آجوئی ءِ درگت ءَ برجم داشتگیں مراگش ءَ وتی گُشتانک ءَ بلوچستان ءِ گپ چِست کُرتگ اَت۔ بلے پدا اے گپّ ءَ عملی دروشم ءَ ھچ وڑیں کمک ءُ دلبڈی دیگ نہ بوتگ اَت۔ اِشی ءَ چہ بلوچانی بھیسہ پُرشت۔ چہ اے بیان ءَ رند پاکستان ءَ وتی زوراکیاں گیشی آؤرتگ اَت ءُ بلوچستان ءِ بازیں دمگاں سدانی کساس ءَ بلوچ کُشتگ ات اَنت ءُ پہ درور ھمے منّانک دیم ءَ آرگ بوتگ اَت کہ کُشتگیں مردم ھندوستان ءِ ایجنٹ اَنت۔ 

ھندوستان یک مزنیں جمہوری تاگتے ءَ ھوار یو این او ءِ ممبر ملکے، بازیں میان استمانی ادارھاں ھوں ھوار اِنت۔ ھندوستان یو این او ءَ ہیومن رائٹس کونسل ءِ ممبرے ءَ گچین کنگ بوتگ ءُ تنیگت ءَ ممبر اِنت۔ بلے مودی سرکار ءَ تچکیں ءُ زاھریں دروشم ءَ بلوچستان ءِ جیڑہ ماں یو این او ءُ دگہ فورماں چست نہ کُرتگ۔ بلے پاکستان ھندوستان ءِ ھلاپ ءَ کشمیر ءِ جیڑہ ءَ ماں یو این او ءَ چست کنگ ءَ ھچ چک ءُ پد نہ بوتگ۔ پاکستان ءِ کشمیر ءِ بابت ءَ تچ ءُ تاگ کنگ ءِ سوب ءَ مودی سرکار ءِ وھد ءَ ماں یو این او ءَ انڈیا ءِ ھلاپ ءَ بازیں رپورٹ شنگ بوتگ اَنت۔ ھندوستان ءِ بازیں راجکار ھمے وتگلائی ءِ تھا اَنت کہ گوں پاکستان ءَ باپاری ءُ ربیدگی سنگتی ءَ چہ پاکستان ءِ تب راست بوت کنت۔ امریکہ ءَ بلین آنی ھساب ءَ پاکستان ءَ ڈالر داتگ بلے پدا ھوں پاکستان ماں اوگانستان ءَ 3000 ءَ چہ گیش امریکہ ءِ لشکریانی کوش ءَ چَکّ ءُ پد نہ بوتگ۔ اے گپ منی سرپدی ءَ چہ ڈنّ اِنت کہ ھندوستان ءِ سیاست دان پرچا تینگہ اے وش پھمی ءَ چہ در نیاینت کہ پہ چندیں ڈالر ءِ باپار ءَ ھندوستان ءِ بابت ءَ پاکستان ءِ پالیسی بدل بیت کن اَنت۔ وھدیکہ پاکستان ءِ جوڑ بوئگ ءِ سوب ھمے گپ ءِ سرا بوتگ کہ ھندو ءُ ھندوستان پاکستان ءِ دژمن اَنت۔

جُست:  پاکستان ءِ بھتام ھمیش اِنت کہ کلبھوشن یادیو ماں بلوچستان ءَ ناشرکاری ءِ ھاترا دیم دیگ بوتگ۔ اے دمگ (بلوچستان) ءَ تو مزنیں دزرسے ءِ واھُند اِت۔ اے درگت ءَ تو چے سرپدی دار ئے؟ 

پسّہ: مئے سرپدی ءِ ردا کلبھوش یادیو ایران ءِ ایردستیں بلوچستان ءِ دمگ چھبار ءَ آوار جنگ بوتگ۔ پدا لھتے شپک ءُ بلیک میلرانی وسیلت ءَ،  کہ آ پاکستان ءِ فوج ءِ ھاترا کار کنگ ءَ اَنت،  پاکستان ءِ دست ءَ دیگ بیتگ۔ اے ھوں جیڑگی اِنت کہ چنکہ اَرزانی ءَ یک مردمے ءَ بئید ء مشکل ءَ دزگیر کنگ بوتگ ءُ پاکستان ءِ ایردستیں بلوچستان ءَ دیم دیگ بوتگ۔