اے گِند ءُ نِند ھالکار "کارلوس زَرتوزا" ءَ گوں بلوچ رھشون ءُ "فری بلوچستان موومنٹ" ءِ سَر کماش واجہ ھیر بیار مری ءَ کُرتگ. دگنیا ءِ بازیں ھالتاکاں شِنگ بوتگ. پہ بلوچی ءِ وانوکانی ھاترا ما اے گلگِدار بلوچی ءَ رجانک کُرتگ ءُ شِنگے کنگ ءَ اِنت.
کارلوس:- اے رندی بوتگیں گچین کاری پاکستان ءِ تاریخ ءَ دومی لَس السی واکداری ءِ گچین کاری گُشگ بوئگ اِنت. بلے تو انگت دز کشی ءِ جار جتگ پرچا.؟
ھیر بیار مری:- اے یک پدّریں راستی ئے کہ گچین کاریاں سَٹ ءُ سودا بوتگ ءُ فوج ءِ لوٹانی پدا سرکن ءُ پِرکن بوئگ ءَ رند عمران خان (گچین بوتگیں مزن وزیر) دیما آرگ بوتگ. عمران خان ءَ باز رند ءَ بلوچ ءِ سرا بیوکیں زُلم ءُ زوراکی ایر جتگ اَنت. اے پَر آئی ءَ موہ ئے کہ وتی کَولانی سرا بہ اوشتیت. بلے اے مئے پد نبودیں ھیالے کہ آ اے ردا چیزے کُرت کنت. فوج ءِ لوٹ یک نامھکمیں جاورے ءِ ردوم دیگ اِنت کہ ایشی ءِ وسیلت ءَ آ دُگنیا ءَ کمک ءُ فنڈ بہ گِیپت. ھمے وڑا پاکستان دگنیا ءَ بلیک میل کنگ ءَ اِنت ءُ ھمے وڑا آ نامھکمیں جاورے ءَ ردوم دیگ ءَ اِنت. پاکستان یک نیمگے اوگانستان، انڈیا یا واشنگٹن ءَ بھتام جنت ءُ دومی نیمگ ءَ چرآھاں زَر ءِ لوٹ ءَ کنت.
کارلوس:- بلوچانی ھستیں جاور ھال چون اَنت؟
ھیر بیار مری :- ھپتاد سال اِنت کہ پاکستان ءَ بلوچستان ایر دست کُرتگ ءُ مارا تنگ دستی ءِ زند گوازینگ ءَ پہ لاچار کنگ بوتگ. دانکہ ما بس زندگ بوئگ ءِ پگر ءَ بہ بئیں ءُ آجوئی ءِ ھیال ءَ چہ دل ءَ بہ کشّیں. ما یک پُرگنجیں زمینے ءِ واھُند اِنت. مئے گورا گیس، تیل ءُ یورنیم مزنیں کساسے ءَ ھست اَنت. مئے گورا زرباری افریقہ ءَ چہ گیشتر سُھر ءِ ھاکوت ھَست اَنت. مئے پادانی چیر ءَ بلین آنی ھساب ءَ ڈالر ھست اَنت بلے اے سرجمیں گنج فوج ءُ پاکستانج واکدارانی دست ءَ روگ ءَ اَنت، مرچی مئے مردم واری ءُ بزّگی زند گوازینگ ءَ اَنت. لُٹّ ءُ پُل ءِ گیش کنگ ءَ کُشت ءُ کوش ءِ توجیل ءِ ردا مئے 20 ھزار ءَ چہ گیش ورناہ آوار جنگ ءُ بیگواہ کنگ بوتگ انت، کُشت ءُ کوش ءِ اے توجیل 1950 ءَ تاں اَنّوں یک شلیں رنگے ءَ برجم اِنت.
کارلوس:- شُمئے مول ءُ مراد یک وتواکیں بلوچستانے ءِ دز گرگ اِنت. اے چونیں ملکے بیت؟
ھیر بیار مری:- ما ہر وڑیں (سرکاری رھبند) دیستگ اَنت، چوکہ السی واکداری (ڈیموکراسی) ھنچو کہ افریقہ، لاطینی امریکہ، مڈل ایسٹ. کمیونزم ھم دیستگ. بلے درس بے سوب بوتگ اَنت. ھمے وڑا ما واھگ داشتگ مارا نوکیں بُنردے ایر کنگی اِنت، "یک کَسے، یک ووٹے" ، بلے اے مئے چاگردی لوٹ ءُ گرزانی ردا بہ بیت. آ مئے ہر ڈیھ جاھنِند ءِ، ابئید ء نیکراھی ءُ ربیتی بگیری ءَ، انفرادی ءُ اجتماعی آجوئی ءُ بنی آدمی حقانی ءُ آھانی واھگ ءُ لوٹانی شرپ ءَ بہ داریت.
کارلوس:- بلے چون یک آشوبی ماڈلے ءَ یک ھنچیں دمگے ءَ گوں ھمگرنچ کن ئے کہ اودا یکیں وھد ءَ یک ٹکّی ءُ سیاسی لیڈر یکے بہ بیت، ھنچو کہ تو ئے؟
ھیر بیار مری:- آجوئیں بلوچستان ءَ ٹکّی سردارانی تاگت بستار نہ داریت. مارا آھانی شرپ دارگی اِنت کہ آھاں پہ مئے مردمانی ھاترا چیزے کُرتگ بلے وھدے کہ آ سیاست ءِ بھر بوئگ لوٹ اَنت تہ آھاں وتی ذاتی نپ ءُ پائدگ سرگوز کنگی اَنت. اگاں ناں ماں ھنچیں ملکے ءِ جوڑ کنگ ءَ پہ راھی اِنت کہ آ مزن ھور ءِ بادشاھی ھاکمانی دروشم ءَ بہ بیت، ءُ ما دیمروی کُرت نہ کنیں.
کارلوس:- تئی ردا واشنگٹن ءُ بیجنگ ءِ میان ءِ اَڑ ءُ کُڈانی آسر بلوچستان ءِ سرا کپت کن اَنت؟
ھیر بیار مری:- چائنا ءِ دزمانجی پاکستان ءِ سرا گیش بو آن اِنت. من ھچبر کسے ءَ کمک کُرت نہ کناں کہ آ منی زمین ءِ لُٹ ءُ پُل کنوکانی ھمراہ داری ءَ بہ کنت. بلوچ، سندھی، کرد ہر ایر دستیں راج بائد یک دست بہ بنت ءُ زوراکیانی ھلاپ ءَ جنگ بہ کن اَنت. ما ایّوک سئیلی جوڑ بوت نہ کنیں. دومی نیمگ ءَ امریکہ چون پاکستان ءِ سرا بھیسہ کُرت کنت؟ پرچا کہ ما درس پوہ اِنت کہ ماں اوگانستان ءَ ھزارانی ھساب ءَ نیٹو لشکریانی کوش ءَ پاکستان ءِ دست ھوار اِنت. پاکستان جھادیاں زَرّ ءُ ٹریننگ دیگ ءَ اِنت.
ھمے وڑا کہ ایشی ءَ (پاکستان) ءَ اسامہ بن لادن ماں ایبٹ آباد ءَ فوجی بُنجل ءِ نَزّیک ءَ پناہ داتگ اَت. امریکہ ءَ یک دل ءُ سِتکیں اتحادی ئے ضرورت اِنت، اے ما اِنت. ھچ شک نیست کہ مئے راج کسان ءُ نزوریں راجے، بلے مارا دگہ نوکیں واجکاری ئے ضرورت نہ اِنت. بلکیں سنگتے ءِ رشتہے بہ بیت.
کارلوس:- (تو چے گُش ئے) ٹرمپ یک دل ءُ ستکیں ھمراھی جوڑ بوت کنت؟
ھیر بیار مری:- میان استمانی تَک ءَ ٹرمپ ءِ یک پدّریں لیکہے. آئی ءِ گپ تِچک اَنت. آئی ءَ پاکستان ءِ راستیں دروشم پجّار اِتگ. بزاں (پاکستان) یک ھنچیں ملکے کہ ایشی ءَ ہر وھد ءَ وتی اتحادی ریپّینتگ اَنت. ٹرمپ تاگت ءِ بستار ءَ گپ جنت، ءُ ھما زبان ءَ گپ جنت کہ آئی ءَ پاکستان پوہ بہ بیت. من ءَ گمان اِنت کہ آ اے ھند ءُ دَمگاں بدلی آرَگ لوٹیت.
