جوسٹن گارڈر
ھمے وڑا جوسٹن گارڈر گوشیت کہ "فلاسفی ءِ جُست ہر وھد ءُ زمانگ ءَ یکّیں دروشم ءَ شُمئے پسّہ آنی ودار ءَ ھَست ءُ موجود اَنت."
ناروی لبزانکار جوسٹن گارڈر ءِ اے کتاب فلسفہ ءِ تاریخ ءِ
 |
| نبشتہ کار جوسٹن گارڈر |
سرا یک ھنچیں کتابے کہ ناول ءِ رنگ ءَ نبشتہ کنگ بوتگ ءُ پہ فلسفہ ءِ نودربرے ءِ ھاترا بُنکی ءُ گھترین کتابے ءِ اَرزشت ءَ داریت. اے کتاب ءِ تھا دوئیں لوٹ پیلہ کنگ بوتگ انت. لبزانک ءِ شوق ءَ داروکے بہ بیت کہ فلسفہ ءِ نودربرے، اے پَرآھاں گھترین سرپدی ءِ ھزانگے.
اے کتاب ءِ مستریں کارست اسکول ءِ کسانیں نودربرے کہ ہر چیزانی سرا سَسّا ءُ جیڑگ ءِ شوق ءَ داریت. نودربر ءِ نام سوفی انت. بلے اے کتاب ءِ وانگ ءِ سَھت ءَ ہر وانوک وت ءَ سوفی ءِ دروشم ءَ زُرت کنت. اے کتاب ءِ کسّہ سوفی ءِ گوں جووانا ءَ چہ اسکول ءَ لوگ ءَ روگ ءِ راہ ءَ گوں ھمے سَسّا ءُ جیڑگ ءَ بندات بیت کہ جووانا ءِ نِزّا بنی آدمانی اے لشکر ءِ تھا یک شخص ئے ءِ اَرزشت چہ آسن ءَ جوڑ بوتگیں "ہارڈ ویئرے" ءَ گیشتر نہ انت. بلے سوفی آئی ءِ چُشیں گپّ ءَ ھچ وڑا تپاک نہ کنت ءُ بنی آدم ءِ اَرزشت ءَ چہ آسن ءِ ہارڈ وئیرے ءَ مستر سرپد بیت ءُ ھمدا جیڑگ ءِ در پچ بیت ءُ سوفی ءِ سفر بندات بیت.
اے درگت ءَ ناشناسیں فلسفہ ءِ استاد نمدی آنی دروشم ءَ سوفی ءِ مازگانی تھا ودی بوتگیں ہر جُستانی پسّہ ءَ دیان کنت.
سوفی اے شھر ءِ یک ھَنچیں کنارے ءَ جھمنند انت کہ اے میتگ ءَ آ دست درچک ءُ دارانی پراہ ءُ نہ کُٹّوکیں جنگلے بندات بیت ءُ سوفی ءِ نزا اے جنگل ءَ چہ آ دست اے جھان وتی گُڈّی سیمسر ءَ سر بیت.
فلسفہ ءِ اے کسّہ چہ ھمے جُست ءَ بندات بیت کہ
"تو کئے؟ اے جھان چہ کُجا اَھتگ؟"
پدا یونان ءِ پلاتون ءِ شَھکدگ ءَ بگر تاں فرانس ءِ سارتر ءَ ، علم مادیات ءِ ائولی شھزانت اسپینوزا ءَ بگر تاں جرمن شھزانت کارل مارکس ءَ، ارستاتالیس ءَ بگر تاں سگمنڈ فرائڈ ءَ، درستانی زانشتی لیکہانی میان ءَ چَھر وران ءَ تاں سائنس ءِ نوکیں لیکہ ءُ بنشوناں کئیت ءُ رَسیت.
بلے فلسفہ ءِ ٹیچر ءِ، سوفی ءَ سرپدی دیگ ءِ وسیلت ایّوک نمدی نہ اَنت کہ روزینی سوفی ءَ سَر بنت. بلکیں سوفی ءِ سَسّا ءُ جیڑگانی پسّہ ءَ بازیں پیت بند ھوں سوفی ءَ سَر بنت. چُشیں پیت بندانی چارگ ءَ سوفی پہ راستی فلاسفر
ءِ ھمراھی ءَ قدیم یونان ءِ ھما دَمک ءُ درانی تَرّ ءُ تاب ءَ کنت کہ اودا قدیم یونان ءِ شھزانت سقراط ءَ زندگی ءِ مزنیں بھرے گوازیینتگ. آ جاگہ قدیم ایتھنز ءِ "اکروپولی" انت کہ یورپی سائنس، سیاسیات، فلسفہ، طب ءُ دگہ زانت ءُ زانشتانی بُنرد ھما جاہ ءَ ایر کنگ بوتگ.
اے کتاب ءِ تھا، انسان ءِ پیدائشت ءِ بابت ءَ، گوں ھُدا ءُ دگہ نادیدیں تاگتاں بنی آدم ءِ رشتہانی بابت ءَ، اے جھان ءِ پیدائشت ءِ بابت ءَ، بازیں جُست کنگ بوتگ ءُ پدا ہر وھد ءُ زمانگ ءِ شھزانت ءُ فلاسفرانی لیکہ ءُ ھیال آنی وسیلت ءَ چُشیں جُستانی پسّہ دیگ ءِ جھد کنگ بوتگ. بلے چوکہ نبشتہ کار ءِ جند اے کتاب ءِ بیستمی سال ءِ یاتگاری شنگ بوتگیں ایڈیشن ءِ پیشگال ءَ گْوشیت کہ "فلاسفی ءِ جُست ہر وھد ءُ زمانگ ءَ یکّیں دروشم ءَ شُمئے پسّہ آنی ودار ءَ ھَست ءُ موجود اَنت."
اے کسہ ھمودا وتی گُڈّی سیمسراں سر بیت کہ شھزانت گوں سوفی ءَ دُچار کپیت. اُمیت انت کہ اے کتاب ءِ وانگ ءَ گوں ہرکس شھزانت ءَ دَچار کپیت ءُ اے زند ءُ زمان ءِ بابت ءَ وتی جُستانی پسّہ ءَ پولیت........
