عنایت گْوش اِیت:
ما کہ شپ ءَ آس ءِ پَھنات ءَ نِشتگیں گڑا من ءَ مات ءَ لھتے سوج داتگ، من تاں زندگی ءَ اے سوج وتی پَلّو ءَ بَستگ اَنت ءُ شموشکار نہ بوتگ آں.
"منی چُک:
یکے ھچبر دروگ مہ بَند
دومی ربّ ءَ بیھال مہ کن
سیمی دُزّی مہ کن ءُ دگر ءِ حق ءَ مہ وَر
چارُمی تُپنگی ئیں مردمانی ھمراھداری ءَ مہ کن۔"
اے کتاب بزاں In the sea there are Crocodiles عنایت ءِ سرگْوست اِنت۔ اٹالین نبشتہ کار Fabio Geda ءَ نبشتہ کُرتگ۔
عنایت اوگانستان ءِ جَھمنندے۔ عنایت گْوش اِیت طالباناں مارا وانگ ءَ نہ اِشتگ۔ مئے وانگ جاہ پروشتگ اَنت۔ پت ءُ مردم کُشتگ اَنت۔ عنایت کساس 10 سال ءِ عمر ءَ چہ اوگانستان ءَ در کئیت۔ لھتے ماہ ءَ شال (بلوچستان) ءَ پوریاگری کنت۔ پدا ایران ءَ کئیت۔ گجر دزگیرے کنت ءُ پدا اوگانستان ءَ دیمے دنت۔ پدا درکپ اِیت ءُ جنان ءُ پْرشان ترکی ءَ سر بیت۔
ترکی ، یونان ءُ بلغاریہ ءِ میانی سیمسر ءَ ایجیئن زِر ءِ کسانیں شَتّے۔۔۔ عنایت ءِ نزّ ءَ مردم گُش اَنت کہ اِشی ءَ گانڈو (Crocodile) مان۔ مردم ءَ ورَنت۔ بلے عنایت گوں وتی سئے ھمسرواں کسانیں لانچُکے ءِ وسیلت ءَ اِشی ءَ مان دنت ءُ یونان ءَ سر بیت۔ یونان ءِ سر بوئگ ءَ گوں ھیلینیک پولیس عنایت ءِ ھمراھاں دزگیر کنت ءُ عنایت درچکے ءِ پُشت ءَ ٹَپّ اِیت۔
پدا عنایت ءَ یونانی زالبولے گِس ءَ بارت ءُ ورگ دنت۔ عنایت گْوش اِیت من کمّے کمّے انگلش ءَ گوں آ سرپد کُرتگ کہ ترکی ءَ سئے ماہ ءَ نندگ ءِ وھد ءَ من انگلش ءِ لھتے گالرِد یات گِپتگ اَنت۔ پدا یونانی زالبول من ءَ 50 یورو دنت ءُ من ٹکٹ کناں ءُ فلاسفرانی شھر ایتھنز ءَ سر باں۔ عنایت گْوش اِیت "من زندگی ءَ اے زالبول ءِ مھراں بیھال نہ باں۔"
پدا عنایت دانتے ءِ ملک ءَ رَوت۔ اے کتاب ءِ نبشتہ کنگ ءِ وھد ءَ عنایت اٹلی ءَ بوتگ۔
اے کتاب پہ انسانیت ءَ یک موتکے۔ اگاں کسے ءَ نہ وَنتگ اَلّم بہ وان اِت ئِے۔
