بلوچ سرمچارے گوں دژمن ءَ میڑ ءَ شھید بوتگ

مکران ءِ کوھی دَمگاں سرمچار فاضل پنّام گوھرام بلوچ سرمچارءُ زور گیریں لشکر ءِ میان ءَ جنگ ءُ چوپانی میان ءَ ٹپّی بوئگ ءَ پَد مرچی شھید بوتگ۔

ھندی بُن شون ءِ ردا بلوچ لبریشن فرنٹ ءَ چہ سیادی داروکیں بلوچ پُسّگ  فاضل پنام ء گوھرام گوستگیں روچاں مکران ءِ کوھی دمگاں  پاکستانی لشکر ءُ سرمچارانی میان ءَ جنگے ءَ ٹپّی بوتگ۔ مرچی شھید بوتگ۔

وھدیکہ تنیگہ ھچ گل ءُ تنظیم ءِ نیمگ ءَ اے وئیل ءِ بابت ءَ ھچ وڑیں جار دیما نیاتکگ ۔

ماھیگ ءِ ورگ ءَ چہ واب ءُ ماژگی تاگت ءِ تھا گیشی کئیت

چکاس اتگیں راستی ءَ چہ اے شون رستگ کہ ماھیگ ءِ کارمرزگ ءَ چہ بنی آدم ءِ ماژگی تاگت IQ ءِ تھا گیشی کئیت۔ پٹ ءُ پول ءَ چہ اے گپ ھوں دیما اتکگ کہ ماھیگ ءِ کارمرزگ ءَ واب ءِ تھا گیشی اَتک کنت۔ 

پنسلوانیا مزن شھدربرجاہ ءِ شنگ بوتگیں جارے ءِ  ردا کسانیں زھگ اگاں ھپتگے  یک رندی ماھیگ بہ وارت۔ تہ چر ایشی ءَ چہ ھمے شون رستگ کہ آئی ءِ ماژگی تاگت IQ ءِ کساس چہ میانی درجہ ءِ ھساب ءَ چار پوائنت ءَ بُرز بیت ءُ ماھیگ زھگانی واب ءِ تھا گیشی کاریت۔

شانزدہ سالئیں فلسطینی جنک ءَ 14 سال ءِ زندان ءِ سزا دیگ بوتگ۔

فلسطینی جہدکار اھِد تمیمی ءِ سرا ھمے بھتام لَڈّگ بوتگ کہ آئی ءَ گوستگیں ماہ ءَ اسرائیلی فوجی نپرے ءَ لَگت جتگ۔ 

بن شون ءِ ردا شانزدہ سالئیں فلسطینی جہدکار اھد تمیمی ءَ را اسرائیل لشکریانی ھلاپ ءَ بدیں سُھن گُشگ ءُ اسرائیلی فوجی نپرے ءَ لگت جنگ ءِ بُھتام ءَ اسرائیلی کورٹ ءَ 14 سال ءِ زندان ءِ سزا داتگ۔

اَھد تمیمی گوستگیں سال ءِ دسمبر ءِ ماہ ءَ دزگیر کنگ بوتگ اَت۔ماں آمیدگس ءَ اھد تمیمی ءَ اے گپ منّ اِتگ کہ آئی ءَ اسرائیلی فوجی نپرے ءَ لگت جتگ۔ آمیدگس ءِ جُست ءِ پسّہ ءَ آئی ءَ درائینتگ "اگاں منی دست پچ کنگ بہ بنت تہ من شُمارا گُشاں کہ من لگّت چون جتگ"