گندھارہ استان ءُ گوتم بدھ ءِ بُت

بشیر شوھاز بلوچ

گندھارہ استان ءِ سرا 350 پیش چہ مسیح ءَ بدھ مت نیکراہ ءِ منوگراں ھاکمی کُتگ۔ گندھارہ استان ءَ ھستیں بلوچستان، پنجاب ءُ اوغانسان ءِ لھتے دمگ ھوار بوتگ اَنت۔ بدھ ھاکم اشوک ءِ استان ءِ پُرشت ءُ پروش ءَ پَد، گندھارہ ءِ لھتے دمگ (اوگانستان) ترکستان ءِ لھتے ٹکّی ھاکمانی ایردستی ءَ کاینت کہ اے ردا تاریخ زانت یونیوسٹی ئے ذکر ءَ کن اَنت کہ بدھ ازم ءِ چیر دستی ءَ شاھدربرجاہ ءَ سنگ تراشی یے زانت ءَ ھوار الہیات، آواگون ءُ دگہ علم وانینگ بوتگ اَنت۔ ماں بامیان ءَ گوتم ءِ دراج کدّیں بُت ھما عہد ءِ نشانی اَنت۔ بدھ مت ءِ منّوگراں بامیان ءَ گوتم ءِ دراجیں بتانی تراشگ ءِ وھد ءَ کوھانی لمب ءَ دراجیں ھونڈ تراش اِتگ ءُ اڈ داتگ ءُ آھانی تھا جاھمنند بوتگ اَنت۔ اے دراجیں ھونڈ بدھ ءِ عالماں وتی عبادت ءُ ریاضت ءِ ھاترا اڈ داتگ اَنت۔

ایرانی مسلمانیں ھاکمانی ماں اوگانستان ءِ ایر دست کنگ ءَ پد بدھ مت ءِ منوگر چرے دمگاں ولگوج کنگ بوتگ اَنت بلے اے مسلمان ھاکمانی جوانی ئے ھمے بوتگ کہ آھاں گوتم بدھ ءِ دراجیں بت کار نہ داشتگ اَنت۔ تاں تالبانی ھاکمی ءِ گُڈ سری وھد ءَ گوتم بدھ ءِ بُت وتی جاہ ءَ مِک بوتگ اَنت ءُ بدھ مت ءِ منوگرانی تراشتگیں ھونڈاں شیعہ مسلک ءِ منوگریں گریب مھلوک نندوک بوتگ اَنت۔

بی بی سی ءِ ردا 2001 ءَ اوگان آمیدگس ءِ اے فیصلہ ءَ پیسر کہ (گوتم بدھ ءِ دراجیں بُت "عہد ظلمات” ءُ کفر ءِ نشانی اَنت ءُ پروشگ بہ بنت) بدھ عالمانی تراشتگیں ھونڈ یکوی گریب ءُ بزگرانی لوگ بوتگ اَنت۔ سئے سَد مال چارینوکیں ھاندان ھمے پراہ ءُ ڈولداریں ھونڈانی تھا جاھمنند بوتگ اَنت۔

2001 ءَ اوگان آمیدگس ءِ چوشیں فیصلہ ءِ سرا یو این او ءُ دگہ بازیں ملک ءُ انسانی گل یک زبان بوتگ اِت اَنت کہ "اوگان آمیدگس ءِ چوشیں فیصلہ رد اِنت۔ گوتم بدھ ءِ تراجیں بت جھان ءِ تاریخی میراث اَنت ءُ بائدیں اوگان آمیدگس وتی فیصلہ ءَ واپس بزوریت” بلے ملا عمر ءِ ماں اوگان سرکاری رسانکدر ءَ شنگ بیوکیں تران ءَ سرجم یکیم کُت اَنت کہ "اوگان آمیدگس ءِ چوشیں فیصلہ شرعی ءُ اسلامی اِنت ، دگنیا ءِ ھچ تاگت مارا چہ اے کار ءَ داشت نہ کنت”

ملّا عمر ءِ گُشتانک ءَ رند ، پاکستان ءُ امریکا ءِ کمک ءَ تالباناں رستگیں ٹوپ ءُ سلاہ کہ سوویت یونین ءُ تالبانانی میان ءِ جنگ ( بقول ملاھاں کفر ءُ اسلام ءِ جنگ) ءَ روسی فوج ءِ ھلاپ ءَ کارمرزگ بوتگ اِتنت، گوتم بدھ ءِ بے ساھیں بُتانی سرا کارمرز بوت اَنت۔ مُلاھانی چم کور اِتنت۔ آھانی ھوش گستا شُتگ اَت کہ اے ھما ٹوھیں انسان ءِ یاتگاری بُت اَنت کہ آئی ءَ وتی زند ءَ انسان وا انسان اِنت دگہ ھچ زندگیں سھدار ءَ تاوان نہ داتگ ءُ بدھ ءِ نیکراہ ءِ بنکی راہ ءُ رھبندانی ردا انسانی کُشت ءُ کوش وتی جاہ ءَ بلکیں چوشیں اوزار ءِ جوڑ کنگ مستریں جُرم اِنت کہ آ سھدار ءَ تاوان بہ دَنت۔

ـــــــــــــــــــــ