پَجّار:
پالو کوئلہو ھستیں وھد ءِ دُرساں چہ گیش سوبمند تریں نبشتہ کار ءِ نام ءَ پَجّارگ ءُ زانگ بیت، اے ردا آئی ءِ سَد ملین ءِ ھساب ءَ کتابانی تاک بھا بوتگ اَنت کہ اِش ماں دُگنیا ءَ نِشتگیں یک سَد ءُ پنجاہ راجانی آبادی ءِ کساس ءَ چہ گیش اَنت. آئی ءِ کتاب دگنیا ءِ گیشتریں مزنیں زبانانی تھا رجانک کنگ ءُ شِنگ کنگ بوتگ اَنت. کتابانی رجانک ءِ درگت ءَ آئی ءَ دگنیا ءِ گھتریں نبـشتہ کارانی ریکارڈ پروشتگ.
بنداتی زند:-
کوئلہو 1947 ءِ سال ءَ ماں "ریئو ڈی جنیرو" ءَ ودی بوتگ. وھدیکہ آئی ءِ عمر 38 بوتگ گڑا آ اسپین ءِ سفر ءَ پیادگ ءَ دَر کئیت. ھمے سفر ءَ، (کوئلہو ءِ گُشگ ءِ ردا) آئی ءَ روحانی آگھی رَستگ ءُ ھمے آگھی آئی ءِ اوّلی کتاب The Pilgrimage ءِ نبشتہ کنگ ءِ سوب جوڑ بوتگ. بلے اے کتاب ءِ شنگ کنگ ءَ آئی ءَ آ پجّار نہ رَستگ کہ آ پجّار آئی ءَ دومی کتاب الکیمسٹ ءِ شنگ بوئگ ءَ پد رَستگ کہ اے کتاب ءِ 35 ملین تاک بھا بوتگ اَنت ءُ ھستیں وھد ءِ مزن نھادیں کتاب زانگ بیت.
کوئلہو ءِ چہ بندات ءَ ھمے واھگ بوتگ کہ آ نبشتہ کاری بہ بیت. بلے آئی ءِ پِسّ ءِ واھگ اے نہ بوتگ. پمیشا آئی ءِ پِت چَر آئی ءَ چہ نہ وش بوتگ. پدا کوئلہو 17 سال ءِ عمر ءَ گنوکانی نادراھجاہ ءَ دیم دیگ بوتگ. اودا کوئلہو ءَ 3 رند ءَ جَھَگ ءِ کوشست کُرتگ بلے بے سوب بوتگ. گَڈ ءَ 21 سال ءِ عمر ءَ آ چہ زندان ءَ یلس کنگ بوتگ.
آئی ءَ قانون وانگ لوٹ اِتگ. بلے سرجم نہ کُرتگے. آئی ءَ بنداتی زند ءِ گیشتریں بھرے تَرّ ءُ گرد ءُ اگولی ءَ گوں گوازینتگ ءُ نشہ ءِ سِلّیں عادت ءِ ھم آماچ بوتگ. رسانک ءِ پِڑ ءَ آئی ءَ کار ھم کُرتگ ءُ شاعری ھم کُرتگ. آشوبی شعر گُشگ ءِ سرا، سیاسی چست ءُ ایراں گوں سیادی دارگ ءِ بُھتام ءَ آ 3 رند ءَ گرگ ءُ زندان ءَ کنگ بوتگ ءُ ٹارچر دیگ بوتگ.
نام کشّیں کتاب:
The Pilgrimage
اے کوئلہو ءِ اوّلی کتاب اِنت کہ آئی ءَ ماتی زبان ءَ نبشتہ کُرتگ. آئی ءِ ردا اسپین ءِ تَرّ ءُ گرد ءِ وھد ءَ آئی ءَ روحانی آجوئی ءُ آگھی رَستگ. چر ایشی ءَ چہ آئی ءَ اے کتاب ءِ نبشتہ کنگ ءَ کمک رَستگ.
الکیمسٹ
اے پالو کوئلہو ءِ دومی ءُ نامدار تریں کتاب اِنت کہ 1987 ءَ شِنگ بوتگ. اے یک کسانیں بچکے ءِ کِسّہ اِنت. بچک شوانگی زند گوازینگ ءَ گچین کنت. آ کتاب وانیت بلے کتاب مزن بہ بنت کہ وانگ ءُ سر ءِ چیر ءَ کنگ ءُ وَپسگ ءِ کار ءَ بہ دیَنت. پدا آ بچک وتی واھگانی پیلہی ءِ ھاترا روحانی سفرے ءَ دَر کئیت. زندمان ءِ بازیں ساھتاں، زند ءِ راستی ءِ در گیجگ ءَ آ جَلّ ءُ مہ جَلّ بیت. گُڈّ ءَ آئی ءَ راستی ءِ ادراک بیت. کسے ءَ کہ کوئلہو ءِ زند گوستاک ونتگ تہ زانت کہ اے کتاب کوئلہو ءِ زند گوستاک ءِ راستیں عکس اِنت کہ آئی ءَ گدار ءِ تَھر ءِ تھا پہ دلکشی بیان کُرتگ.
No comments:
Post a Comment