الکمسٹ ....... پالو کوئلہو

در (1)

بچک ءِ نام سنتاگو اَت.  رو ایرلہ  ءِ سھت ءَ آ گوں میھڑاں ویرانیں چرچ ءَ سر بوتگ اَت. چَت بازیں وھدے ءَ پیسر ڈُر اِتگ اَت، ءُ یک انجیر ءِ درچکے ھما جاہ ءَ رُستگ اَت کہ اودا یک وھدے ءَ پادری ءِ مھراب مِکّ بوتگ.

آئی ءَ شپ ھمدا گوازینگی اَت. وھدیکہ آئی ءَ دیست میھڑ چہ کلنڈیں دروازگ ءَ گوست اَنت تہ آئی ءَ نَزّ ءُ گور ءِ کپتگیں دار ءِ ٹُکّر زُرت ءُ دَر بست کہ شپ ءِ تھاروکی ءَ میھڑ ڈنّ ءَ دَر مہ کپ انت. اے دمگ ءَ گُرکانی تُرس نیست اَت ، بلے یک رندے میھڑے چہ رَم ءَ جَہہ اِتگ اَت، ءُ بچک ءَ دومی سرجمیں روچ پہ آئی ءِ شوھاز ءَ پہ تکانسری گوازینتگ اَت.

آئی ءَ پَرش گوں جیکٹ ءَ چَنڈ اِت ءُ جھل ءَ تِچک بوت، ءُ کتاب کہ آئی ءَ لھتے روچ پیسر سرجم کنگی اَت "سَرجاہ" کُرت. آئی ءَ دل ءَ مستریں کتابے ءِ زورگ ءِ سوڑگ کُرتگ اَت: پہ وانگ ءَ گیش وھد بہ جَنت ءُ پہ سَرجاہ ءِ بدل ءَ گیشتر گوَم بہ بیت.

شپ ءِ نیم ءَ آ جاہ سِرّ اِت، ءُ بُرز ءَ چارگ ءَ لگّ اِت. نیم پُرشتگیں چَت ءِ شَم ءَ استال ترپگ ءَ اَت اَنت.

من ءَ کمّو گیشتر وپسگی اَت، آئی ءَ دل ءَ ھیال کُرت. آئی ءَ اے شپ ءَ ھما واب دیستگ اَت کہ آئی ءَ ھپتگی ساری دیستگ اَت، ءُ اے رَندی پدا آ واب ءِ گُڈسرا جاہ سِرّ اِتگ اَت ءُ واب نیم بُندگ بوتگ اَت.

آ پاد اَتک، ءُ وتی مُکّی دست ءِ گِپت ءُ میھڑانی پاد کنگ ءَ دِلگوش بوت کہ تنیگہ وابینگ ات اَنت.  آئی ءَ ھیال کُرتگ اَت، آ ھمے کہ مَہلہ پاد کئیت تہ آئی ءِ گُما گیشتر میھڑ ھوں چہ واب ءَ بُست کن اَنت. چو ھمے وڑا کہ یک گَیبی تاگتے ءَ  آئی ءِ زند  گوں میھڑاں بندوک کُرتگ اَت، کہ گوں آھانی ھمراھی ءَ آئی ءَ  دو سال سرجم کُرتگ اَت، آپ ءُ کھچر ءِ درگیجگ ءَ ملک ءِ کَش ءُ گوراں آھانی رھشونی کُرتگ اَت. آئی ءَ جیڑ اِت "میھڑ گوں آئی ءَ ھمے وڑا ھمگرنچ اَنت کہ آئی ءَ آھانی سرجمیں تَب ءُ عادت ھیل گِپتگ اَنت". اے درگت ءَ سھتُکے ءِ ھیال کنگ ءَ رَند، آئی ءَ سَما بوت، "یا وَ آئی ءَ وت ءَ گوں میھڑانی تَب ءُ رَنگ ءَ رَج اِتگ"، آ دِلجم بوت.

بلے میھڑانی تھا باز ھنچین اِت اَنت کہ آ پاد آیگ ءَ دیر جنگ ءَ ات اَنت. بچک ءَ پہ نادلسری، گوں مُکّی ءَ یک یک ءَ آھانی نام ءَ توار جنان ءَ آ پاد کُرتگ ات اَنت. آئی ءَ مدام سِتک اَت کہ میھڑ آئی ءِ بولیاں پَھم اِت کن اَنت کہ آ چے گُشگ لوٹیت. اے درگت ءَ آئی ءَ باز وھد ءَ، آھانی دیم ءَ وھدیکہ چہ وتی کتاب ءَ دَرے وَنتگ اَت تہ آھانی بابت ءَ ھم ھمے دِلسِتکیں ھیالے داشتگ اَت. یا آئی ءَ ماں کوچگاں یک شوانگے ءِ بستار ءَ گوں آھاں درد ءُ اندوہ بَھر کُرتگ اَت ءُ آ تھنائی ءِ  شریدار کُرتگ ات اَنت. باز وھد ءَ آئی ءَ پُشت ءَ گوازینتگیں گیاب ءُ میتگانی بابت ءَ گوں آھاں ھبر ءُ ھال کُرتگ اَت.

بلے گوستگیں لھتے روچاں آ گوں میھڑاں ایّوک یک چیزے ءِ بابت ءَ ھَبر کنگ ءَ اَت: یک جنکے ءِ،  سوداگر ءِ جنک ءِ آ ھما میتگ ءَ جاھمنند اَت کہ آئی ءَ چار روچ ءَ رَند اودا سَر بوئگی اَت. سالے پیسر آ یک رَندے ھوں اے میتگ ءَ گوستگ اَت. سوداگر شاھگانیں دُکّانے ءِ واھُند اَت. آ ترند تبیں مردکے اَت ءُ پَژم ءِ کار ءُ بار ءَ کنگ ءَ اَت. آئی ءَ ہر وھد ءَ لوٹ کُرتگ اَت کہ میش آئی ءِ چمّانی دیم ءَ چِنگ بہ بنت، ءُ آئی ءَ اِنّا نہ کُرتگ اَت. یک سنگتے ءَ بچک دُکّان ءِ سوج داتگ اَت ءُ آئی ءَ وتی میھڑ اودا بُرتگ اَت اَنت.

ــــــــــــــــ *****ـــــــــــــ

روان اِنت