فاطمہ من پیداک آں!

دانکے پہ الکیمسٹ ءَ

"گْوات پدا تْرند کَشّگ ءَ اَت، اے 'لیونٹر' اَت۔ ھما گْوات کہ چہ اَپریکہ ءِ ریگزاراں پیداک اَت.
بلے نوں گْوات ءَ ریگزار ءِ وشّیں بوہ گوں نہ اَت، نہ کہ عرب سلاہ بندانی ڈس ءُ نشان۔۔۔۔۔
 ایشی ءَ اَبید، نوں گْوات آئی ءَ یک نوکیں وشبوئے سَر کنگ ءَ اَت. گوں گْوات ءَ دور ءُ دراجیں دیاراں چہ آیوکیں یک جنکے ءِ شھد ءُ شکّلیں توار ءَ چہ چکاریں وشبوئے آستو آستو آئی ءِ لُنٹاں بوسگ دیگ ءَ اَت.
بَچک ءَ بِچکند اِت.
 چہ اے وشبوہ ءَ آشنا اَت.
"فاطمہ من پیداک آں!"  آئی ءَ گْوشت."

ھلاس 30 نومبر، 2018

درانڈیھ ءَ یک کسانیں کوٹی ئِے ءِ تھ ءَ من دراج گِپتگ اَت آں۔ جُھد ءَ اَت آں کہ چَماں واب ءَ بہ دَے آں، بلے ھَنچو گُش یے واب چہ چَمّاں گِسر اَت۔ ھمے کہ چَمّ بند کُرت اَنت تہ ترسناکیں واب ھیالانی تھا چَھر وران ات اَنت۔ اِش آگھی ءِ واب اَت اَنت یا ھیال۔۔۔۔ یا کہ تُرسے اَت۔ وپسگ ءِ سَھت ءَ ھمے کہ من اُبینگ بوتگ اَت آں تہ من اِش پدّرھینتگ اَت۔ 

من پاد اَتک آں۔ جیڑ اِت کہ ڈَنّ ءَ سَرے بہ جَن آں۔ نَزّیک ءِ کافے شاپ ءَ چہ کافے ئِے بہ گِراں ءُ بہ نوش آں ،  بلے ڈَنّ ءَ ھَور رِچک ءَ اَت۔ کوٹی ءِ دَر ءَ سَر کَشّگ ءَ گوں مزنیں دَگ ءِ سر ءَ کَش ءِ پٹرول پمپ ءِ لائٹانی رُژن ءِ کپگ ءَ چہ من دیست دَگ ءِ سر ءَ آپ رُمبَگ ءَ اِنت۔

آستو آستو من در بَست ءُ موبائل دست ءَ کُرت۔ ٹائم چار اِت، نوں شپ ءِ 2:18 اَت۔ کافے شاپ بلکیں بند بہ بیت۔ من جیڑ اِت ءُ پدا تچک بوت آں،  پدا پہ چیزے ءِ نبشتہ کنگ ءِ ھاترا جیڑ اِت کہ چُشیں ھیال ءُ اے ھَوری ئیں شپ ءِ چُشیں نِدارگاں لبزانی کالب ءَ ایر بہ گیج آں۔۔۔۔۔ بلے چون؟  ماژگ کور دیم اَت۔ لبز ھیالانی ھمراھداری ءَ کنگ ءَ نہ اِت اَنت۔ ہر ھیال ءَ کہ من لوٹ اِت کہ لبزانی پوشاک ءَ گور ءَ بہ دیاں تہ دگہ ھیالے ءَ دزمانجَنی بنگیج کُرتگ اَت۔ 

من موبائل ءِ فائلاں پَٹاں بوت اَنت۔ یک فائلے ءَ کہ اودا تصوّف ءِ سرھال ءَ کتابانی پی ڈی ایف ایر اَت اَنت۔ اے گچین ءِ تھا قرآن شریف، بائیبل، علی ابن ابی طالب،  امام غزالی، خلیل جبران ءِ کتاباں ھوار دگہ بازیں کتاب ایر اَت اَنت۔ 

ادا خلیل جبران ءِ کسانیں کتابے ایر اَت. اے کتاب"آندھیاں" ءِ نام ءَ منی ھم نامیں مردمے "بشیر ھندی" ءَ اردو ءَ رجانک کُرتگ ءُ ایشی ءِ تھا 10 کسانیں نبشتانک ھوار اَنت۔ منی نِزّ ءَ اے رجانک کار ءَ جبران باز جوانیں وڑے ءَ اردو ءَ تَرّینتگ۔

اِدا "پالو کوئلھو" ءِ کتابے ایر اَت۔ اے الکیمسٹ اَت۔ میان استمانی تَکاں اے کتاب ءَ نام دَرآؤرتگ۔ مزنیں مزنیں زبانانی تھا رجانک بوتگ ءُ اے کتاب ءِ 65 ملیون تاک بھا بوتگ ءُ مرچیگیں وھد ءَ درستاں چہ گیش بھا بوتگیں کتاب اِنت۔

من یک برے پدا ھمے کتاب ءِ وانگ بندات کُرت۔ وانگ ءَ گوں من ءَ تاھیرے رسگ ءَ اَت ءُ ترانگے ءَ کَپت آں۔ اے یک کسانیں بچکے ءِ کِسّہ اِنت یا سرگْوست اِنت۔ بچک شوانگی کنت۔ آ پمیشا شوانگی کنت کہ آئی ءَ پَند جنگی اِنت۔ نوکیں نوکیں میتگ ءُ دیارانی شوھازگ ءَ سواد ءَ در کپگی اِنت۔ وتی دیستگیں وابانی تابیر کَشّگی اِنت۔

کتاب ءِ بنداتی دَر چہ ھمدا بُنگیج بیت کہ بچک گوں میھَڑ ءَ رو ایرلہ ءِ سَھت ءَ یک ویرانیں چرچے ءَ سَر بیت۔ چرچ ءِ لاپ ءَ ھما جاہ ءَ پادری ءِ ساز ءُ سامانانی جاہ بوتگ اودا مزنیں انجیر ءِ درچکے رُستگ۔ آ گوں وتی جیکٹ ءَ پرش ءَ چَنڈیت ءُ کتاب کہ آئی ءَ لھتے روچ پیسر وَنتگ ءُ ھلاس کُرتگ سرجاھے کنت ءُ وپس اِیت۔ اے شپ ءَ آ پدا ھما واب ءَ گِند اِیت کہ آئی ءَ پیسر ءَ یک رندے دیستگ۔ آ چہ واب ءَ پَدّرَہ اِیت۔ چَمّانی پچ کنگ ءَ گوں آ نیم پُرشتگیں چَت ءِ شم ءَ استالاں گِندیت کہ تْرپگ ءَ اَنت۔ 

پدا کِسّہ دیم ءَ روان کنت۔آ سوداگر ءِ شَرّ رنگیں جنک ءِ دیدار ءِ تلب ءَ دیدگاں دار اِیت ءُ چِد ءَ چہ راہ گِیپت۔

آئی ءِ ھیال ءَ آ وتی شوانگی زند ءِ بابت ءَ سوداگر ءِ جنک ءَ گُشیت، اے سرھال ءَ آئی ءَ چہ کتاباں بازیں کِسّہ یات گِپتگ۔ آ اے کِسّہ آں گوں جنک ءَ گُشیت ءُ جنک ءَ اے بابت ءَ سرپد کنت کہ اے آئی ءِ وتی جند ءِ سرگْوست اَنت۔ آئی ءِ ھیال ءَ جنک آئی ءِ گپّانی سر ءَ باور کنت۔ پرچا کہ جنک وانگ نہ زانت۔ 

بلے بید ء آ جنک ءِ نیمگ ءَ راہ بہ گِیپت آ جِپسی پیرزالے ءِ گْور ءَ رؤت۔ 

پیریں بادشاھے ءَ گوں دُچار کپ اِیت۔ آ بچک ءَ سوگہ کنت کہ "وتی تب ءَ کار گِر، تو اگاں پہ دل ءُ سِتک یک کارے کنگ ءِ واھگ ءَ بہ داریے تہ سرجمیں دُگنیا تئی کمک ءِ ھاترا توجیل ساز اِیت."

 گوں دُزّی ءَ دُچار کپیت ءُ وتی زند ءِ سرجمیں کَٹّ ءَ بِبا دَنت۔ بلے انگت دلپروش نہ بیت ءُ پیریں بادشاہ ءِ داتگیں مستاگ "یوریم" ءُ "تھیومیم" ءِ نشون ءَ وتی ھزانگ ءِ درگیجگ ءَ دیم ءَ جُنزان کنت۔ 

شیشگ ءِ گلاسانی دُکان ءَ کار کنت۔ پدا فاطمہ ءِ ابدمانیں مھر ءِ لذّت ءَ چہ آشنا بیت۔ فاطمہ آئی ءَ سرپدی دَنت کہ مھر ءِ ابدمانیں احساس وھد ءُ پاس ءُ دوری ءُ نزّیکی ءِ پابند نہ اِنت۔

پدا گوں یک کیمیاگرے ءَ دُچار کپگ ءَ رند آ اے راستی ءَ سرپد بیت کہ "تئی ھزانگ ھما جاہ ءَ کَلّ اِنت کہ تئی دل اِنت۔ ابرم گوں بنی آدم ءَ مھروان اِنت، آ بنی آدم ءَ آئی ءِ تِچکیں راہ ءَ ڈَسّ اِیت۔ بلے اے زوراک نہ اِنت، اِشی ءَ بنی آدم وتی تب ءَ کار، کنگ ءَ پہ آجو یلہ داتگ۔" 

اے دُرسیں کارستاں وانوک کتاب ءِ وانگ ءَ گوں دُچار کَپ اِیت۔ من بَس ھمے مارشتانی بابت ءَ گپ جنگ لوٹاں کہ بنداتی دَر ءِ وانگ ءَ من ھمے مارشتاں گوں دُچار کپتگ آں ءُ ھمے یَکّیں مارشت پہ من اے کتاب ءِ بنداتی دَر ءِ رجانک کنگ ءِ ھاترا یک سکینے جوڑ بوتگ ءُ پدا تاں گُڈسر ءَ سَر بوئگ ءَ من اے کتاب ءِ رجانک کنگ ءَ سوبین بوتگ آں۔ 

لبزانک ءِ وانگ ءِ ہرکسی وتی نگاھے، کچّہ چیناں لبزانک ءِ ہر تَھر جُتا جُتائیں رجحانانی تھا بَھر کُرتگ اَنت۔ منی زانت ءِ کَچ اینکہ نہ اِنت کہ من اے کتاب ءَ کجام وڑیں رجحانے ءِ کالب ءَ ایر بہ کناں ءُ گپ بہ جناں۔ 

لبزانک ءِ بابت ءَ جتا جتائیں لیکہ ھم ھَست اَنت۔ بلے پالو کوئلھو ءِ وتی لیکہ ھمیش اِنت ءُ آ وتی یک گلگدارے ءِ تھا گُش اِیت کہ "من وتی باتن ءِ نبشتہ کاراں، وتی جند ءِ جیڑھانی نبشتہ کاراں. وھدیکہ من کتابے نبشتہ کناں، آ کتاب ءَ وتی جند ءِ ھاترا نبشتہ کناں. اے منی ذمہ واری نہ اِنت کہ وانوک آ کتاب ءَ دوست دار اَنت یا ناں."

پالو کوئلھو ءِ لیکہ وتی جاہ ءَ راست اِنت،  بلے شَرّیں ءُ پلگاریں لبزانک گوں جھانی اَرواہ ءَ تران کنت۔ ماں درانڈیھ ءَ آ غَمناکیں شپ ءَ کسانیں کوٹی ءِ تھ ءَ نِندگ ءِ وھد ءَ کتاب ءِ اوّلی دَر ءِ وانگ ءَ گوں من ھیالانی زِر ءَ اوژناگ بوت آں۔ لھتے ھَنچیں ھیال ءُ گیر کہ من ءَ تاھیر بَکشگ ءَ اَت آں ءُ دل ءَ گوست ءِ یات ءُ گیرانی نادیدیں وشّّی ئِے رُدان اَت۔

ھیال ءُ گُمانانی تھا من یک شوانگے اِت آں۔ اے شپ ءَ من بلوچ گُلزمین ءِ کوچگاں یک کسانیں گِدامے ءِ تھا نِندوک اَت آں۔ گِدام ءِ سر ءَ پِر داتگیں تگردانی کسانیں شَملگاں استال تْرپگ ءَ اَت اَنت۔ 

یا من گُمان کُرتگ اَت کہ من اے شپ ءَ بلوچستان ءِ کسانیں کَلّگے ءَ یک کوھنیں کُڈّوئے ءِ تھا دل پہ لاپ وپسوک اَت آں ءُ کُڈّو ءِ لُڑ اتگیں کَمبانی کسانیں ٹُنگاں چہ استال دْرپشگ ءَ اَت اَنت۔ 

بلے منی دیستگیں نِدارگ پالو کوئلھو ءِ کارست ءِ دیستگیں ندارگ ءَ چہ باز دلکشّ تِر ءُ زیبا تر اَت۔ پرچا کہ چہ گِدام ءُ کوھنیں کُڈّو ءِ شملَگ ءُ ٹُنگاں پَدّریں استال چو چرچ ءِ نیم پُرشتگیں چت ءَ زاھریں استالاں آزمان ءِ دلبند ءَ نہ ات اَنت۔ منی نزّ ءَ اے گدام ءُ کُڈّو ءِ چَت ءَ ترپگ ءَ اَت اَنت ءُ من یک شاھگانیں دُگنیائے ءِ تھا وپسوک اَت آں۔ ھمے گُمان ءُ ھیال ءِ سکین اے کتاب ءِ سرجمی ءَ رجانک کنگ ءِ سوب جوڑ بوت۔

۔۔۔۔۔۔۔۔۔۔۔۔

۔۔۔۔۔۔۔۔۔۔۔۔