سیاہ کار

 "منی دیم ءَ کساس پانزدہ کَدمانی دوری ءَ اَمب ءِ درچکانی چیر ءَ منی ھمساھگ ءِ 18 سالیگیں جِنک گوں میر بشّام ءِ بَچک ءَ سیاہ کار بوئگ ءَ اَت"

آزمان جمبراں مانپوش اِتگ اَت۔ ہر چَھار آتراپاں تھاری اَت۔ یک استالے ھوں دَرا نہ اَت۔ مرچی سَرجمیں روچ ءَ ھَور ءَ گوَرتَگ اَت ءُ شیپ ءُ شاھکَوراں آپ آرتَگ اَت۔ میتگ ءِ راستی کَش ءِ مَزن کَور ءِ گرانیں توار شپ ءِ سیاھیں چادر ءَ دِرّان ءُ میتگ ءِ بے تواری ءَ زبانے بَکشگ ءَ اَت۔ 

نوں شپ ءِ 11 بج بوتگ اَت۔ سردی وَدّان اَت۔ کُلّیں میتگ واب کپتگ اَت۔ ھَور انگت سھت سَھت ءِ سرا شَمُورگ ءَ اَت۔ کِبلہی دست ءِ کوھانی سرا گِروگ شَھمگ ءَ اَت۔ 

مرچی ھَنچو گُش ئے واب چہ چَمّاں گِسَر بوتگ اَت۔ من وتی کچّائیں کوٹی ءَ نِشتگ اِتاں ءُ ٹالسٹائی ءِ کتابے دیم ءَ کرتگ اَت ءُ وانگ ءِ جُہدا کنگ ءَ اِتوں۔ ٹالسٹائی  یسوح مسیح  ءِ شونداتے ءَ بنی آدم ءِ purified personality ءِ سرا گپ ءَ اَت۔ ٹالسٹائی ءِ ردا بنی آدم ءَ وتی پلگاریں زندمان ءِ بُن ھِشت مسیح ءِ ڈسّ اتگیں رھبند ءِ سرا ایر کنگی اِنت۔

کوٹی ءِ کبلہی دَر پچ اَت۔ گروک ءِ شَھم سَھت سھت ءِ سرا کوٹی ءِ تھا کپگ ءَ اَت۔ کوٹی ءِ روکپتی  دیوال ءِ سرا آدینکے دَر اَتکگ اَت۔ چہ در ءَ آیوکیں گروک ءِ "پَد شَھم"  (reflection)  آدینک ءِ لَگّگ ءَ پد منی چَمّاں کپگ ءَ اَت۔ من ءَ ھیال اَتک کہ بَلّک ءَ مدام من ءَ گوشتگ "بالو، گِروک ءِ وھد ءَ گِرند یکے آسن ءَ کئیت ءُ دومی آدینک ءَ" پمیشکہ بَلّک ءَ ہر وھد ءَ مزنیں گرند ءُ گروکانی وھد ءَ گِس ءِ آدینک چَپّی کرتگ اَنت۔ من دل ءَ جیڑ اِت "بَلّک ءِ اے گپ ءِ تھا سائنسی راستی ئے بوت کنت؟" من پاد اَتکوں،  دیوال ءِ دیم ءَ جتگیں آدینک چَپّی کُرت۔ اَتک ءُ گَندلانی سرا دراج بوتاں۔

گروک تیز بوآن اَت۔ نوں کوٹی ءِ سرا کمّ کم ءَ ڈالیں ترمپ رچگ ءَ اِت اَنت۔ برے برے گوات ءِ تْرندیں شیکّاں گوں ترمپانی توار پَدی بوتگ اَت۔ من دل گوں واب ءَ دات ءُ دراج بوتاں بلے واب چہ چَمّاں گِسّر اَت۔ گوات ترند بوتگ اَت۔ کبلہی دَر ءَ چہ کمّی گِستا کسانیں مچکدگے اَت۔ مچکدگ ءِ لمب ءَ باگے اَت۔ چار ءُ پنچ کوھنیں اَمبے درچک اِت اَنت۔ گوات ءِ ترندیں شولاں گوں اَمب ءِ درچکانی ژیپ ژیپ ءِ توار ترسناکی ئے ودی کنگ ءَ اَت۔

گوات ءِ کولانی ایر پُرشگ ءَ گوں اَناگھی منی گوشاں کَپت۔ اَمب ءِ درچکانی نیمگ ءَ پاد برمشے۔۔۔۔ چڑکہے ءِ توار اَت۔  ھنچو گُش ئے کہ دو بنی آدم اَنت۔ وت ماں وت ءَ گپّ ءَ اَنت۔ 

"اے تھار ماھی ءَ کئے ادا کئیت؟ اے منی گُمان ءِ ھبر اَنت" من وتی دل ءَ ھیال کُرت۔ بلے نوں توار ساپیں وڑے ءَ منی گوشاں کپگ ءَ اَت۔ من ءَ یقین بوتگ اَت کہ اَمب ءِ درچکانی نیمگ ءَ یک بچک ءُ جنکے ءِ توار اِنت۔ من کوٹی ءِ دَر پَچ کُرت۔ باگ ءِ راستی دیوال ءِ ایر گوات ءَ گران ءُ اَمب ءِ درچکانی برابری ءَ سَر بوتاں۔ تھاری اَت۔ ھچ چیز مَیم بوئگ ءَ نہ اَت۔ اَناگہ ءَ گروک ءِ شَھم ءَ گوں منی چَمّ آھانی سَرا کَپت اَنت۔ من گونڈیں ساھتے ءَ ھیران ءُ اَبکّہ چو گُلمیھ ءَ مِکّ بوتاں۔ ھُدا ءِ پاکیں پیگمبر یسوح مسیح ءِ شون داتگیں "پاک باتنیں بامرد" (purified personality) منی ھیالانی تھا مِرگ ءَ اَت۔ من دل ءَ جیڑگ ءَ لَگّ اِتاں بلکیں منی چَمّ من ءَ ریپّینگ ءَ اَنت۔ "منی دیم ءَ کساس پانزدہ کَدمانی دوری ءَ اَمب ءِ درچکانی چیر ءَ منی ھمساھگ ءِ 18 سالیگیں جِنک گوں میر بشّام ءِ بَچک ءَ سیاہ کار بوئگ ءَ اَت".