بلوچی ءِ کلّانہیں تژن ءُ بچکند نویس علاج نہ رسگ ءِ سوب ءَ بیران بوتگ۔ رپورٹ

بلوچی جھان ءِ زباناں چہ یک زبانے کہ بازیں تَھرانی تھا اے زبان ءِ نبشتہ کنوکانی کَچ نہ بوئگ ءِ برابر اِنت۔ آزمانکاری ءُ شاعری ءَ اگاں یک کِرّ بہ کن ئے ءُ دگہ تَھرانی نیمگ ءَ بیا اِت تہ جھان ءِ لبزانکی تھرانی تھا بازیں تَھر ھست اَنت کہ آ تھرانی نبشتہ کنوک بلوچی ءِ تھا نیست اَنت۔

 اکرم صاحب خان، بلوچی تژن ءُ بچکند نویسی ءِ پڑا بلوچی لبزانک ءِ اولی سرپ ءِ ندکاراں گوں ھساب بیت۔ گوستگیں 28 سالاں آئی ءَ بلوچی ءَ نبشتہ کرتگ۔ آئی ءَ گوستگیں روچاں نادراھی ءِ سوب ءَ اے کوڑھیں دگنیا یلہ دات ءُ وتی مکیمی جاگہ ءَ راہ گِپت۔ فوٹو حال و احوال

جھان ءِ لبزانک ءِ تھا ھستیں وھد ءِ لوٹ ءُ گزرانی ردا یک تَھرے گِدار نویسی اِنت۔ بلے ماں بلوچی ءَ اے گپّ ءِ گُشگ ءَ  ھچ وڑا رَد نہ بئیں کہ گدار نویسی ءِ پڑا بلوچی ءِ نبشتہ کار لَنکُکانی سرا ھساب بنت۔ باز کمّ اَنت۔ اے ردا مستریں یک نامے واجہ منیر احمد بادینی اِنت کہ آئی ءَ اے پڑا دِلجمیں کارے کُرتگ۔

دومی اے پڑا واجہ پروفیسر گنی پرواز ءُ ڈاکٹر حنیف شریف ءُ دگہ لھتے نام اَنت کہ ایشانی اے پڑا کار گندگ بنت۔ 

یک تَھرے تژن ءُ بچکند نویسی ءِ پڑ اِنت کہ اے پڑا گچینی نام باز کمّ اَنت۔ اے پڑ ءِ تھا واجہ محمد بیگ بیگل،  واجہ اکرم صاحب گچینی نام بوتگ اَنت کہ اے پڑا اے دوئیں واجہانی باز وانگ کرزیں کتاب دیما اَتکگ اَنت۔ اے واجہاں وتی وس ءُ واک ءَ ماں بلوچی لبزانک ءَ باز دلجمی ءَ کار کرتگ ءُ تاں ھدّے ءَ بلوچی ءِ وانوکانی تُنّ پروشتگ ءُ وتی وھد ءُ نوبتانی ھساب ءَ چاگرد ءِ ترجمانی شرّیں وڑے ءَ کرتگ۔

بلے بلوچ ءِ بد بھتی ھمیش اِنت کہ بلوچ وتی حق ءُ ملکیت ءِ واجہ وت نہ اِنت۔ بلوچی ءِ لبزانکاراں چہ سرکار ءِ نیمگ ءَ ھچ وڑیں آسراتی رسگ ءَ نہ اِنت۔ چیاکہ بلوچ ءِ زمین پُلگ بوتگ ءُ بلوچ گُلام کنگ بوتگ۔ بلوچ  ءِ سرا چٹّی ئیں پاکستانی ءُ ایرانی سرکار،  بزاں پنجابی ءُ گجر ھچ وڑا نہ لوٹ اَنت کہ بلوچی زبان دیمروی بہ کنت ءُ لس مھلوک ءِ زبانے جوڑ بہ بیت۔ پمیشا بلوچاں چہ آھانی ماتیں زبان پُلگ بوتگ ءُ بلوچی زبان دوئیں سرکارانی وانگ جاھاں وانینگ نہ بیت۔

بلوچ تنگ دست اِنت۔ بے وس اِنت۔ گُلام اِنت۔ پمیشا دِرتہ پُچّیں بلوچ ءِ تھا اے سکّت نیست کہ آ وتی راجی سراں پھاز اِت بہ کنت۔ بلوچ ءِ بازیں سَر ءُ جوانیں نبشتہ کار نادراھی ءِ سوب ءَ بیران بوتگ اَنت۔ آھاں شرّیں علاج نہ رستگ۔ بلوچی ءِ گچینی تژن ءُ بچکند نویس واجہ اکرم صاحب خان ھوں علاج نہ رسگ ءِ سوب ءَ بیران بوتگ۔