ما کَبرے ءَ زندگیں۔ ایمنی ءِ مزن داد گِروکیں قانون دان ءِ لوگبانُک چائنا ءِ زندان ءَ گنوک بوتگ۔

چینی مزن داد گروکیں اُلسی حقانی ھاترا کار کنوکیں لیو ژیابو ءِ ساری ءِ سنگتے ءَ آئی ءِ ماژگی نادراھی ءِ بابت ءَ سرپدی داتگ، وھدیکہ آئی ءَ لیو ژیا ءِ ماژگی نادراھی ءِ درگت ءَ دزنشان جنگ ءَ نمدی دیم دیگ بوتگ۔

لیو ژیا، یک شاعرے ءُ اُلسی بالادستی ءِ ھاترا کار کنوکیں کانون دان لیو ژیابو ءِ جَن اِنت کہ گوستگیں ھَپت سالاں گِس بندیگی  (house arrest ) ئے سوب ءَ ماژگی نادراھیانی آماچ اِنت

2010 ءَ لیو ژیا ءِ لوگواجہ  لیو ژیابو ءَ ایمنی ءِ مزن داد دیگ بوتگ۔ ایشی ءَ رند ، 56 سالئیں لیو ژیا چائنا پولیس ءِ نیمگ ءَ گس بند کنگ بوتگ۔ آئی ءِ ردا ، آ کمیونسٹ سرکار ءِ زوراکیانی آماچ اِنت۔

آئی ءَ 2009 ءَ  لبزانک ءِ مزن داد گروکیں  ھیرٹا میولر ءِ سرا  شعری دروشم ءَ دیم داتگیں نمدی ءَ ھبر داتگ کہ  ’’آ گنوکی ءِ سیمسراں سربوتگ۔

بے وسی انت (ہر چہار آتراپاں)

ھیالانی درنگازگ ءِ حقّاں چہ زبھر ایں ما

ناکہ وتی گپاں کسے ءَ سر کرت کنیں

ما کبرے ءِ تھا زندگ ایں

مُرتگیں جونے ءِ مثال ءَ ایں ما

شعر

چینی سرکاری ھلاپ کار ءُ ندکار ’’لی او ایے وا ‘‘ ءَ نمدی ءِ کاپی  دسمبر ءِ 9 تاریخ ءَ وتی فیس بک اکاؤنٹ ءَ شنگ کرتگ۔

وھدیکہ چینی لبزان گوں لیو ژیا ءِ دز نبشتگیں نمدی بیگواہ انت۔ چیاکہ لیو ژیا گوستگیں ھپت سالاں ماں بیجنگ ءَ گِس بندیگ اِنت۔

لی او ءَ ماں برلن ءَ   ھبر دیان ءَ گوشتگ کہ من پہ ھمے اوست ءَ لیو ژیا ءِ لبز ماں رسانکدر ءَ دیما آؤرتگ انت کہ مگرب ءِ ملک اے بابت ءَ گوں چینی سرکار ءَ ھبر ءُ ھال بہ کن انت۔

لیو ژیا ءَ نمدی ءَ ھال داتگ ءُ گوشتگ کہ آئی ءَ ماژگی نادراھی ءِ ھاترا درمانانی ضرورت اِنت۔ دل ءِ تیزی ءِ سوب ءَ آ یک رندی تُستگ ءُ کپتگ۔

بیجنگ ءِ نشتگیں آئی ءِ  دگہ مھروانے ءَ وتی نام زاھر نہ کنگ ءِ شرت ءَ ھبر داتگ ءُ گوشتگ، گوستگیں چار ماہاں من گوں آئی ءَ دوچار نہ کپتگاں۔ آ پولیس ءِ کنٹرول ءَ اِنت۔

لیو ژیا ءِ لوگواجہ لیو ژیابو السی حقانی پد جنی ءِ آسرا چائنا سرکارءِ نیمگ ءَ گرگ ءُ بندیگ کنگ بوتگ۔ آ گوزوکیں سال ءِ ماہ ء ھپت ءَ کینسر ءِ نادراھی ءِ سوب ءَ بیران بوتگ۔