بلوچستان ءَ زُلم ءُ زوراکی ءِ دْرچ تیز کنگ بوتگ۔

پاکستان ءِ ایر دستیں بلوچستان ءَ گوستگیں یک ھپتگے ءَ زُلم ءُ زوراکی ءِ دْرچ تیز کنگ بوتگ ءُ لس مھلوک ءِ جنگ ءُ کُشگ ءُ بیگواہ کنگ یک شَلا برجاہ اِنت۔

رستگیں ھالانی ردا بلوچستان ءِ دمگ آواران، مشکے،  مستونگ  ءُ دگہ بازیں دمگاں پاکستانی لشکر ءِ جاری ئیں زُلم ءُ زوراکی ءِ درچ شاھگان بوتگ ءُ گوستگیں دو روچ ءَ دشت ءُ مند ءَ پاکستانی لشکر ءِ زوراکیانی ھال سر بوتگ۔

مستونگ ءَ لشکری ارش برجاہ انت ءُ گوستگیں یک ھپتگے ءَ بازیں مردمانی دزگیری ءُ بیگواھی ءِ ھال سر بوتگ۔ وھدیکہ مشکے ءُ آواران ءَ گوستگیں دہ روچانی میان ءَ لشکر کشی تیز کنگ بوتگ ءُ سدانی ھساب ءَ مردمانی گار ءُ بیگواہ کنگ ءِ ھال انت۔ وھدیکہ آواران ءَ پاکستانی لشکر ءَ زوراکی کنان ءَ دو بلوچ پُسّگ شھید کرتگ اَنت۔

مکران ءِ دمگ دشت ءَ زیکیں روچ ءَ پاکستانی لشکر ءَ بیڑ بُرتگ ءُ رستگیں ھالانی ردا گس گِس ءِ پٹ ءُ پول ءِ وھد ءَ 9 بلوچ دزگیر کنگ ءُ بیگواہ کنگ بوتگ انت کہ آھانی تھا دو کسانیں زھگ ھوار انت۔ دشت ءَ زوراکی ءِ درچ انگت برجاہ اِنت۔

 مند ءِ بازیں دَمگاں مرچی زوراک ءِ لشکر مان رِتکگ ءُ مند ءَ گوں دشت ءَ ھوار کنوکیں راہ ءُ دَگ بَستگ ءُ کوھی دمگ کترینز، تلی دار، ناگی در،  کَلگ کور،  بانسر ءُ پیپات ءُ دگہ دمگاں پاکستانی زوراکیں لشکر ءِ دیم کِنزی برجاہ اِنت ءُ دشت ءُ مند ءِ میانی کوہاں ھیلی کاپٹرانی توار ءُ تیرگواری ءُ ترندیں تراکانی توار ایش کنگ بوئگ انت۔